Dåt börestää wörd 1723 baged.
Da Andersens koone we bit 1550 önj üüs schörkeböke tubääg ferfülie.
Önj e köögen fine we di heetstiinj, di båkoun än dåt hooling tu di kåfen önj e dörnsch.
Köögendöör än Katschuur san nuch sü as 1723 än uk da büüljke än pooste, köögenscheew än taleriich. Da stoule san eefter üülje münstere mååged wörden. Önj e båkoun wårt nuch båågen, tu „Frühstück im Andersen-Hüs“. Köögen än dörnsch wjarn da iinjsiste wurme rööme önjt hüs
Aw e tjulerdörnsch fine we dåt lökebeed. Heer släipen da bjarne.
Aw di klainkbeslåch dil tu e piisel stoont jü iirtål 1619, di as nuch üt dåt stää for 1723.
Di piisel as diling fersoomlingsdörnsch. Heer wårde uk pååre waid. Bai e brädjdöör stoont en üülj schrün foon 1647. Da smuke kachele önj e piisel än dörnsch hääwe we üt dåt maieristehüs foon e Ostenfelder maierai. Dåt tableau ouer di stoopkåfen as iinj foon fiiw iinjse, wat wi mååged wörden san.
Di stoopkåfen wårt foon e köögen stooped än heet smuke bile üt e biibel.
Uner jü messinghaube hiirt jü teekoon.
Ääder da dööre for dåt lökebeed san nü riiche for tase än talere inbaged.
Da stoule san sü as önj e köögen, Da häigene hääwe da wüste foon e saifloose mååged ma jare „Initiale“.
Jü hiitjing as önj diheere rüm ääder da kachle ferläid.
Önj e forteele twasche bousem än boog fine we sööder- än norderdöör,
E sööderdöör wörd salten brükd åles gäng än köm döör e norderdöör.
En tääl säit, dåt di dånsche kining säid häi, jü döör tu`t norden läiger mååge tu lätjen, sü dåt da stulte frasche et hood for ham dil naame schönj, wans rüt lüpen. Da fünen ouers en bääderen wäi än lüpen reeglings rüt.
Et wörd uk nuch ferteeld, dåt da Klookrisinger di Saandi wans tu schörks gängen döör e forteele kömen, weer di üülje schörkewäi wään as
Önj di gung tu e bousem wus aw e rucht sid e hånebousem än jü knachtekåmer.
Heer san nü da toiläte.
Önj e gääweldörnsch as en släipdörnsch.
Aw e looft as dåt toorpsarchiif. Deer fine we böke än bile tu Risem-Lonhams toorpshistorie, soomeld önj da leeste 40 iir än ales ouer di Frasche Feriin for e Ååstermååre än dåt Andersen-Hüs.
Önj e bousem as åles sü blaawen as´t wus. Deer san bånke, scheewe än hiitjing inbaged am`t for da geeste meeklik tu måågen. Önjt swinestai as en köögen kiimen än önj e haingstebousem, rüm for bileütstalinge. E noost bai e pump as üt ån stiinj houen. Deer stönje nü böke boowenaw üt üüsen äine ferlåch, tu ferkuupen.
Bai e mör aw jü rucht sid fine we än bil foon C.L.Jessen „Der Bierkönig“.
Önj e låås as nü dåt teooter ma 120 satplååse än en grut staloosch. Heer as dåt kultuuräl laawen tuhüs for teooter än musiik. Da floose foon e feriin ööwe heer än treese ap, plååttjüsch, tjüsch än frasch wårt spräägen än we heelpe sü ma, da spräke tu hüüljen. Ouers et jeeft uk fordreegninge, leesinge än “Modenschau”.
Dåt hüs as en kultuurstää än uk en museum.
